Talvsamband Føroya Faroechess

Tað er trongt í oddanum í væl mannaðu talvkappingini Janus Open á Eiði, nú seks umfør eru avgreidd. Eitt hálvt stig skilir teir fremstu tíggju telvararnar í røðini. Tvørámaðurin í Havnar Telvingarfelag, Sjúrður Thorsteinsson, er saman við tveimum íslendingum á odda, nú tvey umfør eru eftir. Sjúrður hevur vunnið á bæði Rógva Egilstoft og Martin Poulsen, og spælt javnt móti Luitjen Akselsson Apol. 

Talvkappingin “Janus Open” á Eiði tykist hava óvanliga sterka atdráttarmegi.   Í fjør, tá henda kapping fór av bakkastokki, var áhugin so stórur, at luttøkumet var sett. Og í ár, nú kappingin verður hildin á øðrum sinni, verður luttøkumetið í fjør væl og virðiliga sprongt. 

Fylgjast kann við beinleiðis á: https://live.faroechess.com/

Oddaliðini í landskappingini í talvi vunnu stórsigrar í 4. umfari í dag. FM-liðið hjá Havnar Telvingarfelag vann óvæntað heili 4-0 á Klaksvíkar Talvfelag. Oddaliðið hjá Sandavágs Talvfelag vann í sínum lagi eisini ruddiliga, eitt hálvt stig er nú á muni millum oddaliðini. Nú er lagt upp til rættiligt toppbrak í fimta umfari millum Sandavág og Havnina.

Fleiri av føroysku talvfeløgunum hava havt serstakar snarkappingar í desember, sum annars hevur verið friðarligur við telving. Landskappingin hevur ligið still síðan seint í november, men nú eftir nýggjár verður herjað á aftur.

Leygardagin 13. desember kl. 12:30 verður jólatalvkapping í hølum Havnar Telvingarfelags, Finsen í Havn. Talan er um eina festliga liðkapping við góðum jólastemningi. 2 telva á hvørjum liði – eitt barn og ein vaksin, t.d barn við foreldri, ommu ella abba. 5 umfør verða telvað við tíðini 10 min + 5 sek á klokkuni. Kaffi og okkurt gott afturvið verður at fáa, og møguliga er ein stuttlig jólavitjan eisini á skránni. Til ber at melda til luttøku við at skriva til kappingarleidarin@faroechess.com, og viðmerkja nøvn á luttakarunum. Freistin er fríggjadagin 12. desember kl. 18.00. Øll eru hjartaliga vælkomin! Tilmelding higartil sæst her: Tilmelding

Leygardagin 15. november varð skipað fyri FM í talvi fyri gentur í Finsen í Havn. 6 gentur luttóku í kappingini, og telvað vórðu 5 umfør. Føroyameistari skuldi finnast í aldursbólkunum U13 og U11, og nummar eitt og tvey í aldursbólkinum U13 fara at umboða Føroyar til Noðurlandameistaraskapið, sum verður í Noregi í vár.

Paringarnar til kappingarnar í vikuskiftinum eru nú klárar. Bólkarnir B og C byrja fríggjakvøldið, meðan bólkarnir A, D og E byrja leygarmorgunin.